阿仔將來做乜

Banker朋友既囝囝同我屋企個光頭仔年紀相若，果日同佢一家人食飯，Banker朋友話：「CK，我對個仔其實冇乜期望啦，但求佢第日大個，千祈唔好好似我咁入Bank做就好啦！」

「好多後生仔都希望可以好似你咁做banker喎…」我話：「你搵咁多錢…」

「有代價架CK…」Banker朋友話：「返工返到冇晒朋友呀，仲有咁多politics，好過癮牙？」

我點了點頭，我明白朋友既意思，另一方面又有d唔認同。

上個禮拜大傷風，幫襯左街口果個醫生。

再對上一次睇醫生既時候，我記得佢同我吹水講起，佢個女就快入大學。咁我就好奇問阿醫生：「喂，你個女入U，揀左乜野科呀？」

「唉，激死我呀，叫極佢都唔聽！」醫生放低手上既聽筒：「叫左十幾年，叫佢千祈咪做醫生，到入U啦，死都話要揀醫科，我真係就快俾佢激死。」

「你個女讀書叻，醫科先收佢遮！」我索左索我個鼻：「你應該開心至係呀！而且做醫生受人尊重又搵到錢，冇乜唔好丫！」

「你講下笑好！」醫生不知幾咁激動：「我幫你睇個症，咪收你一百幾十！賺到幾多呀！你知唔知，讀果陣好辛苦架，實習果陣，d時間會搞到你咩朋友都冇呀！我聽到阿女話讀醫，我不知幾擔心佢會搞到嫁唔出呀。」

我又係點了點頭。有d同意又有d唔同意。

*****

我選擇做生意，不能否認既，係或多或少受到自己老豆既影響。將來光頭仔長大成人，可能都一樣好似我咁，幾十年受到我既「影響」，而選擇從商都未定。

問心果句，我跟Banker朋友同街口醫生一樣，對自己個仔將來做返自己果一行，其實好有保留。因為作為一個行內人，你總係最清楚，風光既背後到底有幾多代價。做老豆，大概唔會希望自己個仔，要承受自己曾經承受過既痛，不過我諗，現實社會總係你睇我好時，我又睇你好。到頭黎你果行難捱d，抑或我份工惡頂d，好難比較既。

我明白做人父母，總希望阿仔阿女條路平平坦坦，搵唔搵到大錢，人生係咪好成功都唔緊要，最緊要係平平安安開開心心。不過，望係咁望，實際會變成點？人生始終係佢地既，我地能夠掌握到既，其實只係極少極少。

*****

唔好意思，請容我賣些少廣告。尋日行過書局，發覺自己本書原來上左架。(係，我查實每次我都係行過書局先知道自己本書已經出左…)。今年出版社call我話會出書既時候，我第一個反應查實係：「下？唔係下話？幫我出書唔駛蝕本咩？仲出？」

寫下寫下，居然出到第四本。其實過去幾年，每次我都諗，拿，呢次應該係最後一本啦掛，點知第二年又有下文。點都好，好多謝呢幾年幫我出書既出版社，冒住蝕本既風險幫我出版。更加多謝參與校對既出版社/AM730既同事們。唉，自己知自己事，平日要你地幫我改錯字改白字，辛苦晒你地啦。我諗，寫手之中，應該好少稿件會錯得好似我果d咁過份。

一如過往，其實我估呢本應該係最後一本啦掛。不過將來既事，的確係講唔埋既。

盛惠68蚊…太貴？唔抵？我呃錢？問我有冇搞錯？

喂，通漲呀朋友。奶粉同尿片好貴呀。